អ្នកចំម្រាញ់ថ្នាំលំដាប់ទី២ហ្គូនី (Second Tier Alchemist Gu Ni)

ការដេញថ្លៃលំដាប់អភិជន (Premier Auctions): ជាសាលដេញថ្លៃដ៏ធំបំផុតនៅក្នុង ទីក្រុងវូថាន់ (Wu Tan City) និងជាសាខារបស់ត្រកូលដែលមានទ្រព្យសម្បត្តិបំផុតនៅក្នុងអាណាចក្រជាម៉ា (Jia Ma Empire) គឺ ត្រកូលអភិជន (Premier Family)។

ត្រកូលអភិជន គឺជាត្រកូលដ៏ចំណាស់បំផុតមួយ និងជាកម្លាំងដ៏មានឥទ្ធិពលនៅក្នុងអាណាចក្រជាម៉ាអស់រយៈពេលរាប់រយឆ្នាំមកហើយ។ បណ្ដាញទំនាក់ទំនងរបស់ពួកគេពិតជាគួរឱ្យស្ងើចសរសើរ ហើយថែមទាំងមានពាក្យចចាមអារ៉ាមថា ត្រកូលអភិជនមានទំនាក់ទំនងយ៉ាងជិតស្និទ្ធជាមួយរាជវង្សនៃអាណាចក្រជាម៉ាទៀតផង។

នៅក្នុងអាណាចក្រនេះ ត្រកូលអភិជន (Premier Family), ត្រកូលណឡាន (Nalan Family), និង ត្រកូលរីតធ័រ (Ritter Family) គឺជាត្រកូលធំៗទាំងបី ដែលមានទំនាក់ទំនងយ៉ាងទូលំទូលាយទាំងក្នុងពិភពពាណិជ្ជកម្ម និងយោធា។

ហេតុដូច្នេះហើយ ដោយមានត្រកូលអភិជននៅពីក្រោយ ទោះបីជាប្រាក់ចំណេញនៃការដេញថ្លៃនោះទាក់ទាញខ្លាំងយ៉ាងណាក៏ដោយ ក៏គ្មានអ្នកណាហ៊ានសាកល្បងធ្វើអ្វីប្រឆាំងនឹងពួកគេដែរ។

សម្លឹងមើលទៅសាលដេញថ្លៃនៅខាងចុងផ្លូវ ស៊ាវយ៉ាន (Xiao Yan) បានបត់ចូលទៅក្នុង ច្រកផ្លូវតូច (Alley) មួយ ហើយប្រញាប់គ្របដណ្ដប់ខ្លួនដោយអាវបិទជិតពណ៌ខ្មៅ។

អាវពណ៌ខ្មៅមិនត្រឹមតែបិទបាំងផ្ទៃមុខរបស់ស៊ាវយ៉ានប៉ុណ្ណោះទេ វាក៏បានកែប្រែរូបរាងដ៏ស្គមស្គាំងរបស់គេឱ្យមើលទៅហាក់ដូចជាធាត់ជាងមុនផងដែរ។ ទោះបីជា សៀវអឺ (Xue Er) កំពុងសម្លឹងមើលមនុស្សក្នុងអាវនេះ ក៏នាងមិនអាចដឹងថាជាស៊ាវយ៉ានដែរ…

បន្ទាប់ពីគ្របដណ្ដប់ដោយអាវពណ៌ខ្មៅ ស៊ាវយ៉ានបានដកដង្ហើមធំដោយក្ដីធូរស្រាល។ វាមិនមែនមកពីស៊ាវយ៉ានមានការប្រុងប្រយ័ត្នខ្លាំងពេកនោះទេ ប៉ុន្តែគឺដោយសារតែ ទឹកវិញ្ញាណជំនួយកម្លាំង (Foundation Elixir) នេះវាមានតម្លៃពេក។ សម្រាប់បណ្ដាត្រកូលនានា ភាពទាក់ទាញនៃទឹកវិញ្ញាណជំនួយកម្លាំងគឺធំធេងណាស់។ ប្រសិនបើមាននរណាម្នាក់អាចផលិតវាបានច្រើន វានឹងមានន័យថាយុវជនជំនាន់ក្រោយរបស់ត្រកូលនោះនឹងលូតលាស់ក្នុងល្បឿនយ៉ាងលឿន ដែលជួយឱ្យត្រកូលបង្កើនអំណាច ហើយនាំទៅរកវដ្តវិជ្ជមាន។

ដើម្បីជៀសវាងបញ្ហាដែលមិនចាំបាច់ ស៊ាវយ៉ានមានតែជ្រើសរើសការលាក់បាំងខ្លួនឯងតែប៉ុណ្ណោះ….

ដោយប៉ះថ្នមៗទៅលើដបត្បូងពណ៌ស ដែលមានភាពត្រជាក់បន្តិច ស៊ាវយ៉ានបានដើរយឺតៗចេញពីច្រកផ្លូវតូច ហើយសំដៅទៅកាន់សាលដេញថ្លៃនៅខាងចុងផ្លូវ។

នៅក្រោមក្រសែភ្នែកប្រុងប្រយ័ត្នរបស់ឆ្មាំដែលពាក់អាវក្រោះពេញខ្លួន ស៊ាវយ៉ានបានដើរចូលទៅក្នុងសាលដេញថ្លៃដោយមិនឈប់ឈរ។

ភ្លាមៗនៅពេលដែលស៊ាវយ៉ានចូលមកដល់ខាងក្នុង កម្ដៅដ៏ក្ដៅក្រហាយពីពន្លឺព្រះអាទិត្យត្រូវបានជំនួសដោយអារម្មណ៍ត្រជាក់ស្រិប។ វាធ្វើឱ្យមនុស្សមានអារម្មណ៍ដូចជាបានឈានជើងចូលទៅក្នុងពិភពថ្មីមួយ។

ក្រឡេកមើលកាត់សាលដ៏ប្រណីត ស៊ាវយ៉ានបានរកឃើញបន្ទប់ចំហៀងមួយយ៉ាងរហ័ស។ នៅលើទ្វារដែលនាំទៅកាន់បន្ទប់នោះ មានអក្សរចែងចាំងថា “បន្ទប់ពិនិត្យ (Inspection Room)”។

ពេលដើរចូលទៅខាងក្នុង បន្ទប់នោះមានសភាពទំនេរស្ងាត់ជ្រងំ មានតែបុរសវ័យកណ្តាលម្នាក់ដែលកំពុងអង្គុយធុញថប់នៅទីនោះ។ ឮសម្លេងបើកទ្វារ បុរសនោះបានងើបក្បាលឡើង ហើយនៅពេលឃើញស៊ាវយ៉ានក្នុងអាវខ្មៅ ចិញ្ចើមរបស់គាត់បានជ្រួញបន្តិច។ ប៉ុន្តែភ្លាមៗនោះ ទឹកមុខរបស់គាត់បានប្តូរទៅជាស្នាមញញឹមបែបអាជីពថា៖ "លោកម្ចាស់ តើលោកមានបំណងយកអ្វីមកពិនិត្យដែរឬទេ?"

"បាទ។" នៅក្រោមអាវពណ៌ខ្មៅ សំឡេងដ៏ស្ងួត និងចំណាស់មួយបានអណ្ដែតចេញមក។ វាគឺជាសំឡេងរបស់ យ៉ាវឡាវ (Yao Lao)!

ស៊ាវយ៉ានបានដើរទៅមុខ ហើយដាក់ដបត្បូងពណ៌សនៅលើតុនៅពីមុខបុរសវ័យកណ្តាលនោះ។

"នេះគឺជា?" ដោយភាពងឿងឆ្ងល់ បុរសវ័យកណ្តាលបានរើសដបត្បូងពណ៌សឡើងយ៉ាងប្រុងប្រយ័ត្ន ហើយហិតវា។ ទឹកមុខរបស់គាត់បានប្រែប្រួលភ្លាមៗ ហើយនៅពេលគាត់សម្លឹងមើលទៅមនុស្សក្នុងអាវខ្មៅវិញ ក្រសែភ្នែករបស់គាត់មានលាយឡំដោយភាពកោតសរសើរ៖ "លោកម្ចាស់ លោកគឺជា អ្នកចំម្រាញ់ថ្នាំ (Alchemist) មែនទេ?"

"បាទ។" សំឡេងចំណាស់នោះបានបន្លឺឡើងម្ដងទៀត។

"តើខ្ញុំអាចសួរបានទេ តើថ្នាំអ្វីនៅក្នុងដបនេះ? តើវាមានប្រសិទ្ធភាពអ្វី?" នៅពេលឮថាគាត់កំពុងដោះស្រាយជាមួយអ្នកចំម្រាញ់ថ្នាំ បុរសវ័យកណ្តាលបានសួរដោយការគោរពកាន់តែខ្លាំង។

"ទឹកវិញ្ញាណជំនួយកម្លាំង (Foundation Elixir)៖ វាអាចបង្កើនល្បឿននៃការហ្វឹកហាត់កម្លាំងធាតុ ប៉ុន្តែវាមានប្រយោជន៍សម្រាប់តែមនុស្សដែលមានកម្រិតក្រោម លំដាប់អ្នកហឹកហាត់ (Rank 1: Dou Zhe / Disciple) ប៉ុណ្ណោះ។"

"អូ? វាអាចបង្កើនល្បឿនហ្វឹកហាត់កម្លាំងធាតុបានមែនទេ?" ឮសម្តីរបស់យ៉ាវឡាវ ទឹកមុខរបស់បុរសវ័យកណ្តាលបានប្រែប្រួល។ មនុស្សគ្រប់គ្នាដឹងថា កម្លាំងធាតុអាចត្រូវបានហ្វឹកហាត់តាមរូបមន្តដែលបានកំណត់ប៉ុណ្ណោះ ហើយដោយសារ ផ្លូវដែលថាមពលធាតុហូរក្នុងរាងកាយ (Qi Paths / Meridians) របស់បុគ្គលម្នាក់ៗគឺខ្សោយខ្លាំងណាស់នៅចំណុចនេះ ប្រសិនបើឥទ្ធិពលនៃថ្នាំខ្លាំងពេក នោះផ្លូវថាមពលធាតុនឹងផ្ទុះ ហើយមនុស្សនោះនឹងស្លាប់...

"ទឹកវិញ្ញាណរបស់ខ្ញុំគ្មានផលប៉ះពាល់ទេ ហើយថាមពលឱសថគឺមានសភាពទន់ភ្លន់បំផុត ដូច្នេះវានឹងមិនបង្កឱ្យមានរឿងបែបនោះកើតឡើងឡើយ។ លោកមិនចាំបាច់បារម្ភពីរឿងនោះទេ"។ ហាក់ដូចជាគាត់អាចយល់ពីអ្វីដែលបុរសវ័យកណ្តាលកំពុងគិត សំឡេងចំណាស់បានពន្យល់ដោយស្ងប់ស្ងាត់។

ទឹកមុខរបស់គាត់បានប្រែប្រួលម្តងទៀត បុរសវ័យកណ្តាលបានដាក់ដបត្បូងពណ៌សនៅលើតុនៅពីមុខគាត់ដោយប្រុងប្រយ័ត្ន ហើយសួរដោយការគោរពថា៖ "លោកម្ចាស់ តើលោកអាចរង់ចាំបន្តិចបានទេ? ខ្ញុំត្រូវសុំឱ្យលោកគ្រូ ហ្គូនី (Gu Ni) នៃសាលដេញថ្លៃយើង មកពិនិត្យទឹកវិញ្ញាណនេះ!"

"បាន ប្រញាប់ឡើង។" ដោយគ្រវីដៃ ស៊ាវយ៉ានមិនបានធ្វើពុតជាសុភាពរាបសារឡើយ ហើយអង្គុយលើកៅអីនៅក្បែរនោះ។

បុរសវ័យកណ្តាលបានងក់ក្បាលយ៉ាងលឿន ហើយប្រញាប់ចាកចេញពីបន្ទប់។

អង្គុយលើកៅអី ស៊ាវយ៉ាន (Xiao Yan) រក្សាភាពស្ងប់ស្ងាត់ ហើយមិនបានព្យាយាមនិយាយជាមួយយ៉ាវឡាវឡើយ។ នេះគឺជាកន្លែងរបស់អ្នកដទៃ ហើយការប្រុងប្រយ័ត្នគឺល្អជាងការធ្វេសប្រហែស។ តើអ្នកណាដឹងថាប្រហែលជាមានរបស់ដែលអាចលបស្តាប់ការសន្ទនារបស់ពួកគេ?

បន្ទាប់ពីរង់ចាំក្នុងបន្ទប់បានមួយសន្ទុះ បុរសវ័យកណ្តាលបានត្រឡប់មកវិញជាមួយព្រឹទ្ធាចារ្យម្នាក់ដែលស្លៀកពាក់អាវរពណ៌បៃតង និងមានសក់ពណ៌សបន្តិច។

នៅលើទ្រូងរបស់ព្រឹទ្ធាចារ្យរូបនេះ មិនមែនជាផ្កាយមាសទេ ប៉ុន្តែជាអ្វីម្យ៉ាងដូចជាឆ្នាំងចម្រាញ់ថ្នាំ ហើយនៅលើឆ្នាំងនោះមានខ្សែប្រាក់ចំនួនពីរដែលចែងចាំងយ៉ាងប្រណីត។

"លោកម្ចាស់ នេះគឺជាលោកគ្រូ ហ្គូនី (Gu Ni) នៃសាលដេញថ្លៃរបស់យើង។ គាត់គឺជា លំដាប់គ្រូធំ (Rank 3: Da Dou Shi / Grandmaster)! ក្នុងពេលជាមួយគ្នានេះ គាត់ក៏ជា អ្នកចំម្រាញ់ថ្នាំ (Alchemist) លំដាប់ទី ២ ផងដែរ!" បុរសវ័យកណ្តាលបានណែនាំអ្នកចំណូលថ្មីដោយការគោរព។

ឮពីអត្តសញ្ញាណរបស់ព្រឹទ្ធាចារ្យរូបនេះ ចិញ្ចើមរបស់ស៊ាវយ៉ានបានលោតឡើងដោយសភាវគតិ។ នេះជាលើកទីមួយហើយដែលគេបានជួបអ្នកចំរាញ់ថ្នាំផ្សេងក្រៅពីយ៉ាវឡាវ។ គេបានពិនិត្យមើលព្រឹទ្ធាចារ្យរូបនោះយ៉ាងហ្មត់ចត់។

ព្រឹទ្ធាចារ្យនោះមានមុខឡើងក្រហម ហើយទោះបីជាអាវពណ៌បៃតងនោះមើលទៅសាមញ្ញក៏ដោយ ប៉ុន្តែមានពន្លឺតិចៗដែលជះចេញពីវា។ ច្បាស់ណាស់ អាវនេះមានបង្កប់ដោយ ស្នូលសត្វចម្លែក (Monster core) ខ្លះ។ នៅលើផ្ទៃមុខដ៏សាមញ្ញរបស់ព្រឹទ្ធាចារ្យរូបនេះ តែងតែមានភាពអំនួតដែលអ្នកចំរាញ់ថ្នាំទាំងអស់សុទ្ធតែមាន។

ខណៈពេលដែលស៊ាវយ៉ានកំពុងពិនិត្យមើលហ្គូនី ហ្គូនីក៏កំពុងសិក្សាពីមនុស្សនៅពីមុខគាត់ផងដែរ។ អ្នកចំរាញ់ថ្នាំមិនដូចជាអ្នកហាត់កម្លាំងធាតុដទៃទេ ហើយពួកគេត្រូវបានស្វែងរកយ៉ាងខ្លាំងដោយកងកម្លាំងផ្សេងៗ។ ដូច្នេះ នៅពេលដែលហ្គូនីកំពុងសិក្សាស៊ាវយ៉ាន គាត់ក៏កំពុងព្យាយាមទាយថា តើអ្នកចំរាញ់ថ្នាំរូបនេះជាអ្នកណា។

បុរសវ័យកណ្តាលបានរើសដបត្បូងនៅលើតុយ៉ាងប្រុងប្រយ័ត្ន ហើយហុចវាទៅឱ្យហ្គូនី…

ដោយកាន់ដបត្បូងពណ៌ស ហ្គូនីបានហិតក្លិនក្រអូបឈ្ងុយជាមុន ខណៈដែលភ្នែកចំណាស់របស់គាត់បានបិទបន្តិច។ ដោយផ្អៀងដបបន្តិច ទឹកពណ៌បៃតងមួយតំណក់បានហូរចេញពីមាត់ដបយឺតៗ ធ្លាក់មកចំកណ្តាលបាតដៃរបស់ហ្គូនី។

សម្លឹងមើលទឹកពណ៌បៃតង ហ្គូនីបានដកម្ជុលប្រាក់មួយចេញមក ហើយនៅលើចុងម្ជុលនោះមានរំញ័រនៃកម្លាំងធាតុបន្តិចបន្តួច។ គាត់បានជ្រលក់វាចូលទៅក្នុងទឹកពណ៌បៃតង ហើយកូរវាបណ្តើរៗ…

ជាមួយនឹងការកូរម្ជុល ទឹកមុខដ៏ស្ងប់ស្ងាត់របស់ហ្គូនីបានប្រែទៅជាទឹកមុខដ៏ម៉ឺងម៉ាត់។ បន្តិចក្រោយមក គាត់បានដាក់ទឹកពណ៌បៃតងត្រឡប់ទៅក្នុងដបត្បូងវិញ។ នៅពេលគាត់សម្លឹងមើលស៊ាវយ៉ានម្តងទៀត ផ្ទៃមុខដ៏អំនួតរបស់គាត់មានភាពកោតសរសើរបន្តិច។ ដោយងាកទៅរកបុរសវ័យកណ្តាល គាត់បាននិយាយថា៖ "ទឹកវិញ្ញាណនេះស្ថិតក្នុងលំដាប់ថ្នាក់ទី ២។ អ្វីគ្រប់យ៉ាងដែលបាននិយាយពីមុនគឺជាការពិត!"

ឮដូច្នោះ បុរសវ័យកណ្តាលបានដកដង្ហើមធំដោយក្តីធូរស្រាល ហើយញញឹមយ៉ាងរំភើបទៅកាន់ស៊ាវយ៉ាន៖ "លោកម្ចាស់ តើលោកមានបំណងដាក់ដេញថ្លៃទឹកវិញ្ញាណនេះមែនទេ?"

"បាទ តើអ្នកអាចដាក់ដេញថ្លៃវាឱ្យបានឆាប់តាមដែលអាចធ្វើទៅបានទេ?"

"ហិហិ គ្មានបញ្ហាទេលោកម្ចាស់។ លោកម្ចាស់ សូមយករបស់នេះទៅបន្ទប់ដេញថ្លៃទីមួយ។ ជាសំណាងល្អ យើងកំពុងមានការដេញថ្លៃនៅទីនោះឥឡូវនេះ ហើយទឹកវិញ្ញាណរបស់លោកនឹងត្រូវដាក់ដេញថ្លៃភ្លាមៗ!" បុរសវ័យកណ្តាលបានញញឹម ខណៈពេលដែលហុចកាតដែកពណ៌ខ្មៅងងឹតមួយឱ្យ។

"យល់ព្រម។" ដោយយកកាតដែក ស៊ាវយ៉ានមិនបានរង់ចាំទេ ហើយបានចាកចេញពីបន្ទប់ភ្លាមៗ។

"លោកគ្រូហ្គូនី តើគាត់ពិតជាអ្នកចំរាញ់ថ្នាំមែនទេ?" លុះត្រាតែស៊ាវយ៉ានបានដើរចេញផុតពីភ្នែក ទើបបុរសវ័យកណ្តាលសួរតិចៗទៅកាន់ហ្គូនី។

"បាទ គាត់គឺជាអ្នកចំរាញ់ថ្នាំ។ ថាមពលវិញ្ញាណ (Soul Perception) ដ៏រហ័សរហួនរបស់គេ មិនអាចខុសឡើយ..." ហ្គូនីបានងក់ក្បាល ប៉ុន្តែចិញ្ចើមរបស់គាត់នៅតែជ្រួញ ហើយគាត់បានរអ៊ូថា៖ "ប៉ុន្តែតើគាត់មកពីណា? ខ្ញុំមិនដែលឮពីអ្នកចំរាញ់ថ្នាំណាម្នាក់ដែលអាចចម្រាញ់ថ្នាំលំដាប់ទី ២ នៅក្នុងទីក្រុងវូថាន់នេះទេ"។

"តើខ្ញុំគួរធ្វើការស្រាវជ្រាវខ្លះទេ?"

ហ្គូនីបានផ្អាកមួយសន្ទុះ មុននឹងគ្រវីក្បាល៖ "មិនទាន់ទេឥឡូវនេះ។ អ្នកចំរាញ់ថ្នាំទាំងអស់សុទ្ធតែមានចរិតប្លែកៗ ហើយប្រសិនបើគេដឹងថាឯងព្យាយាមជីកកកាយប្រវត្តិគេ គេនឹងមានចំណាប់អារម្មណ៍មិនល្អចំពោះការដេញថ្លៃរបស់យើង។ ការធ្វើឱ្យអ្នកចំរាញ់ថ្នាំដ៏អាថ៌កំបាំងម្នាក់មិនពេញចិត្ត មិនមែនជាទង្វើដ៏ឆ្លាតវៃឡើយ។"

ងាកមកវិញ ហ្គូនីបាននិយាយតិចៗថា៖ "ដើម្បីឱ្យគេមានចំណាប់អារម្មណ៍ល្អចំពោះការដេញថ្លៃរបស់យើង ឯងគួរតែដឹងថាត្រូវធ្វើយ៉ាងណា មែនទេ?"

"ហិហិ ខ្ញុំយល់ហើយ។"

"ចាំទុក ទោះបីជាយើងមិនអាចក្លាយជាមិត្តនឹងគេក៏ដោយ ក៏យើងមិនអាចធ្វើឱ្យគេខឹងដែរ។ បើមិនដូច្នោះទេ..." បន្ទាប់ពីបន្សល់ទុកពាក្យសម្តីដ៏ត្រជាក់បន្តិច ហ្គូនីក៏បានចាកចេញពីបន្ទប់ដែរ។